Cytu reiz maņ ruodīs, ka Latgolā energeju vajag mierēt na džoulūs voi kilokalorejuos, bet susejūs. Nu reita jū redzi vodūt bārnim stuņdis, piecpušdīnē – kaidu naviņ koncertu, a vokorā symts kilometri atstatiņ – jau diseni baikerim. Susejūs, ar eisū e. Partū ka Māris – kurs to napazeist Māri!!! – nav ni Susējs (napadzelai valk rodurokstus ar upi Dienvidsusēja), ni Susiejs (ir taidi, kurim pateik vysur divskoni).
Kai tu tyki Kraujā i kas tev ir Krauja?
Krauja – vīta, kuru apceļojūt bierneibā, es te salaužu savys frišuos slēpis. Jau tūreiz tei beja zeime, ka dzeivis ceļā maņ laikam vajadzēs pīstuot šamā spāka vītā, kura ir zalta vydsceļš storp dzerauni i piļsātu! Vīta, kur var skoluot kuojis Daugovā, siežūt ūzūla zorūs!!!
Kas tev pateik i kas napateik Latgolā?
Latgola ir kai dzymtuo ūļneica voi pogolms, kurā spieri pyrmūs sūļus... Jei navar patikt voi napatikt, jei vīnkuorši ir tova!
Cylvāku Latgolā palīk mozuok. Tys ir labi, švaki voi taida ir dzeive?
Pasaulis viesturē ir pīdzeivuots daudz paisumu i bāgumu... Tān izdzeivojam bāgumu, bet – ticit maņ, leluoku satraukumu myusūs radeis dreizais paisums!
Kaids ir tipisks latgalīts?
Tipiskais latgalīts ir aizdūmeigs tips, kuram dzymtys rokstūs ir tik jaudeigi sasajaukušys genetiskuos kruosys, ka jis i pats naspiej nūsabreineit par tū, kas dzymst juo protā i dvēselē. Cylvāku suga, kurai ir miļzeigs radūšuos energejis potencials!
Cik daudz tu runoj latgaliski? Kaida ir tova latgalīšu volūda?
Latgalīšu volūdā runoju pīteikūši daudz, izbaudūt Leiksnai, Vabaļai, Neicgaļam, Kolupam, Vuorkovai rakstureigū runuošanys maneri, kurys spylgtuokī reprezentanti beja bruoli Skryndys.
Tu esi vitals i ospruoteigs cylvāks. Voi tev ir kaids meiluokais “aņuks” ci jūks?
Paļdis par komplimentim, bet paustīs ar sagatavuotom ospruoteibom navaru i nagrybu, jo ospruoteibai voi jūkam juodzymst organiski saspēlē ar atbiļsteiguo breiža sajiutom i atmosferu.
Pamastuos lauku sātys laikam ir tovu ocu i dvēselis suope?
Pamastuos lauku sātys ir munys Latgolys dvēselis rāta... Kuru grib nūdadzynuot, īrakt dūbē, nūleidzynuot ar zemi i padareit par globalizacejis uperi, līkūt mums aizmierst savu identitati. Grīztī kūka lūgi, šklaupsti – tei meiluo kūka budonka, kurys povorda dvēselis syltumu gribīs nūslēpt kuldā ar vysim Latgolys pakolnim i azarim. Partū ka tys ir, kas atškir nu puorejūs!
Tu tān taisi raidejumus “Latgolys piļsātu stuosti”. Kaidi i par kū tī byus, kod jūs skateituoji varēs redzēt?
Raidejumu cyklys byus par daudzkruosainū emoceju paleti, kuru varim giut kotrā Latgolys daudznacyonalajā piļsātā. Par cylvākim, kas veidoj sovu, atkuortuošu, sovu kulturvidi. Redzēt varēs nu oktobra.
Cylvāka dvēselis spīgeļs ir acs. A sātom tod tī ir lūgi?
Sātu lūgi ir cylvāku dvēselis spīgeļs!!!
Tevi fascinej Latgolys staraveri. Parkū?
Munā dzymtā ir bejuši staraveri nu Kaunatys pusis... Itū cylvāku dzeivis uztvere, cītais raksturs ir zvaliejuši jim saglobuot savys tradicejis i religeju, kurys deļ jī beja gotovi plutavuotīs pa pasauli, atsasaceit nu vysa muoksleiguo, nu molys uzspīstuo. Latgolys teritoreja kliva par jūs dzimtini, kod vēļ nabeja dybynuota Latvejis vaļsts... Es jūs skaitu par Latgolys kulturvidis naatjamamu sastuovdaļu i pīmāru tam, kai vajag krist i ceļtīs par sovu identitati.
Tev ir diploms, kurā īraksteita profeseja – aktieris. Voi taisneiba pasacīņam, ka vysa dzeive ir teatris?
Pādejī nūvāruojumi maņ līk dūmuot, ka dzeive ir kai eksperimentaluo laboratoreja i mes jamā asam boltuos pelis, kurys sovys dzeivis procesā teik pakļautys emocionalajom svuorsteibom – tys dūs jaunys atzinis deļ turpmuokūs paaudžu pylnveiduošonys.
Kū tu gribietim dareit, kod byusi peņsejā?
Peņsejā izlasiešu naizlaseituos gruomotys, nūsavieršu naradzātuos filmys, izdūmuošu naizdūmuotuos dūmys, i, beidzūt, sakuortuošu garažu!
Reiga... Voi ībraucieju nu Latgolys var atškiert piec gaitys, manerem ci driebu?
Daudzi latgalīši Reigā pruovej puorvarēt gravitacejis spāku i lidoj tik augši, augši, ka aizmierst par savom saknem. Bet mes tok zinim, ar kū tys beigsīs...
Kaida ir myusu nuokūtne? Kas myus sagaida?
Maņ nav dūta īspieja īsavērt nuokūtnis spīgelī, i labi, ka tai, a to pagaistu intriga. Bet nūjaušu tikai vīnu – dobys Muote myus dreiži pērs ar dīviškū reiksti!
