Mes vysi grybam byut pīdareigi kaidai kūpīnai. Lelpiļsātu steigā dažreiz aizmierstam, ka i mes poši veidojam sovu vidi. Ite varātu vuiceitīs nu mozūs pogostu i piļsātu pīmārim, kur vītejī īdzeivuotuoji ir aktivi, poši vierza iniciativys i na tikai kritizej, bet i izsoka prīkšlykumus, kai padareit pīviļceiguoku sovu vidi, kai motivēt jaunīšus palikt i justīs lapnim par sovu zemi.
Augšdaugovys nūvoda Leiksnā bejušuo školys āka beja pamasta nūvuortā 15 godus. Tok naapdzeivuotajai ākai beja potencials, i bīdreiba “Mūsu Līksnai” (latg. “Myusu Leiksnai”) uzsuoce vacuos školys atjaunuošonys dorbus. Kai itys stuosts aizasuoce i deļkuo ir svareigi saglobuot sovys kūpīnys kulturvidi, pastuosteja bīdreibys “Mūsu Līksnai” vaļdis prīšksādātuoja Ieva Kudiņa.
Ieva Kudiņa ir četru bārnu mameņa, dzymuse Jākubpilī, bet, kūpš apsapreciejuse, par sātu sauc Leiksnu. Ite pavadeiti niu jau 10 godi. Jai vysod ir bejuse gribiešona atteisteit vidi, kurā dzeivoj, i vīns nu vierīneiguokūs projektu ir Leiksnys školys atjaunuošona.
“Mani īdvasmuoja kaida cyta škola, kura beja atjaunuota i kurā aktivi dorbuojuos kūpīna. Maņ lykuos, ka varātu pajimt itū āku i suokt koč kū dareit. Bīdreibys bīdri beja cīš atsauceigi i gotovi dorbuotīs,” pastuosteja Ieva.
Dorbi bejušajā školā suocēs ituo gods pavasarī. Var tikai īzadūmuot, cik daudz dorba juoīgulda juos sakuortuošonā, partū ka āka natyka izmontuota vaira nakai desmit godu. Jei beja na tikai pamasta, bet godu laikā pīgružuota, pylna ar atkrytumim, i tys vyss beja juosavuoc i juoizvad. Āka tyka izteirāta, nūmaineits greidys sagums atseviškuos telpuos, puorbaudeiti škūrstyni i cepli, kab varātu izmontuot apkuri, īvylkts iudinsvods i padareiti daudzi citi dorbi, kab pošlaik bejušajā školā varātu dorbuotīs bīdreibys i nūtikt pasuokumi.
Bīdreiba aizsuoce dorbu 2023. godā, i februarī jai paliks diveji godi, jimā dorbojās 15 bīdri. “Es dūmoju, ka mes saimnīkuosim ilguok, ka vyss nūtiks piec plāna. Bazneica ir cīš pretimnuokūša i, prūtams, prīsteram ari pateik, ka ite koč kas nūteik, ka ite nav vīnkuorši pamasta āka. Leiksnā ir problemys ar telpom dažaidim kulturys pasuokumim, ari mums kai bīdreibai nabeja sovu telpu, partū izlēmem, ka ite varam gon poši dorbuotīs, gon organizēt kulturys pasuokumus, kai ari apvīnuot puorejuos aktivuos bīdreibys, kurys varātu izmontuot itū āku, partū ka jei ir cīš lela. Ideju ir daudz i jūs palīk vys vaira. Ākā ir īreikuotys telpys bīdreibom, kurys jau aktivi teik izmontuotys. Tūmār dorba vēļ ir daudz, ākā jiutams caurviejs i ir dīzgon solts, partū juonūmaina lūgi i durovys, itūšaļt ir apstyprynuots LEADER projekts, kura ītvorūs tys tiks padareits. Ieva pastuosteja, ka leluokais izaicynuojums ir finansiejums, teik raksteiti projekti, bet daudz kas teik dareits par pošu bīdru leidzeklim. “Itūgod sajēmem pošvaļdeibys bīdreibu leidzdaleibys projekta finansiejumu, kū izmontuojom komunikaceju remontdorbim. Daudz īguldom i struodojam poši, vysu dorom sovom rūkom. Mums ir pasaveics, ka bīdreibā ir dažaidi specialisti,” pastuosteja Ieva.
Bīdreiba “Mūsu Līksnai” reikoj pasuokumus, apvīnoj Leiksnys pogosta kūpīnu, aicynoj vītejūs īdzeivuotuojus byut aktivim jebkurā vacumā. Ieva stuosta, ka, saleidzynojūt Leiksnu ar cytim pogostim, Leiksnys īdzeivuotuoji ir cīš aktivi: “Maņ pateik dažaidi izaicynuojumi, tys dūd dzeivei eipašu jāgu. Ir milzeigs gondarejums, radzūt rezultatu, gon maņ, gan vysim bīdreibys daleibnīkim. Kod saīt kūpā forši cylvāki, jim vysod atsarūn daudz dažaidu ideju. Napaceļamu projektu nav, mes asom puorlīcynuoti par sevi”.
Bīdreiba sadarbeibā ar Leiksnys apvīneibys puorvaļdi ir lobīkuortuojuse Leiksnys prūda krosta lineju, ir nūpļautys nīdris, organiziejuse muzykys i muokslys festivalu “Muzykys Skrytuļs”, organiziejuse pyrmū īdzeivuotuoju forumu nūvodā, izveiduojuse bagažnīku tierdzeņu pi Leiksnys bazneicys, realizāti dažaidi citi projekti, kai ari bīdreiba organizej dažaidus kulturys i sporta pasuokumus.
Runojūt ar Ievu, jiutams pozitivisms i puorlīceiba – vyss byus labi. Vēļ plānūs ir daudz jaunu projektu, tok leluokais bīdreibys fokuss ir Leiksnys školys atjaunuošona, tei tūmār ir lela āka i, leidz ar tū, milzeiga atbiļdeiba. Ieva sarunys nūslāgumā soka – Leiksna ir lobuokuo vīta, kur dzeivuot. Vide, kurā dzeivojam, sarunys, kū dzierdam kotru dīnu, leidzcylvāku emocejis roda nūskaņuojumu, kurā mes veramīs iz situaceju pogostā, piļsātā i vaļstī kūpumā.
“Maņ pateik lauku dzeive, plašums i mīrs. Mes Leiksnā asom lokalpatrioti, vīns nu bīdreibys mierku ir saglobuot kulturviesturyskū montuojumu, tradicejis, veiduot vidi, kas ir draudzeiga saimem. Vīns nu munu mierku ir, kab muni bārni ite palyktu dzeivuot. Tei laikam ir reidzinīku īdūma, ka ar Reigu beidzās Latveja, bet eistineibā tai nav, uorpus Reigys jei tikai suocās, vyss ir atkareigs nu myusu pošu. Ka nikuo nadareisim, ari ite byus švaki. Pavaicojit bīdreibys bīdrim – vysi saceis, ka Leiksna ir lobuokuo vīta, kur dzeivuot.”
Komentāri