Mūs lasa Daugavpils, Ilūkstes, Preiļu, Krāslavas, Dagdas, Aglonas, Līvānu un citās pilsētās un novados
2019. gada 12. decembris
Ceturtdiena
Iveta, Otīlija
-0.9 °C
daži mākoņi

Pasaule caur objektivu

Jau zeimiejums olā iz sīnys – sova veida stopkadrs. Raudzejums apturēt laiku, kopēt telpu. Tuoliņuok – gleznys, fotografeja, kino. Rāmeiši i kadri suoc vaira i vaira īīt myusu apziņā. Ci kotrys cylvāks myusu laikūs ir vierīs iz pasauli caur objektivu... Vysmoz caur mobiluo telefona, ar kurim kotru dīnu pasaulī teik sataiseits miļjardim digitalū fiksaceju. Bet ir cylvāki, kuri ar itū vieršonūs nūsadorboj profesionali. Vīns nu jūs – videomeistars Ivars Utināns.

 Kod i kai tu saproti, ka byusi videomuokslinīks?

Tai pa eistam 2007. godā... Bet ari pyrma tuo fočieju/filmieju gon ar VHS Mini kamerom, gon ar pyrmajim telefonim, kurim beja 0,7 megapikseli i video izškiertspieja 144x96 punkti! Maņ pošam tuos tehnikys nabeja, aizajiemu nu muosys, nu draugu. Kod 2005. godā iz telefonim filmējom kautiņa insciniejumu, izreiz izavielieju byut par operatoru, a ni akteri! Tys laikam izīt nu munys īškejuos pasaulis – beju aktivs, vysod gribieju byut uzmaneibys centrā, bet na tai, kai vysi!

 Izguojušgod “Boņuku” dabuoja dokumentaluo kina “Latgalīši Pīterpilī”. Tu filmieji, raksteji skonu, montieji... Kaids ir tovs latgaliskums?

Muns latgaliskums vysod beja manī. Muni tāvs i muote ir nu Dagdys i Preiļu. Tāvs saimē regulari kaidu vuordu da i latgaliski pasoka, par tū i pats varieju nadaudz runuot. Bet nabeju par tū sovu volūdu drūss, lai breivi komunicēt. Tei latgalīšu volūda ruodejuos nadaudz jautra, taida naformala. Maņ cīši pateik vyss naformalais, breiva gaisūtne! Taisūt kinu, daudz laika pavadeju ar komandu, kurā 80% komunikacejis nūtyka latgaliski. I piecyn tuo suoku daudz drūsuok runuot latgaliski. Var saceit, ka tys beja muna latgaliskuma atmūdys laiks!

 Tu taisi muzykantim videoklipus. Kai beja ar “Bez PVN” “Eņgeli sviļpoj”?

Dūmoju, ka myusu kūpeigais dorbs pi kinom padeve Guntim Rasimam ideju paraudzeit pastruoduot ar mani kai klipu operatoru. Tymā laikā “Bez PVN” suocēs ūtrei elpa – suoce raksteit i laist jaunys dzīsmis. Par tū jim vajadzēja i meklēt jaunus sadarbeibys partnerus svaigim klipim. Maņ cīši pateik “Bez PVN” dzīsmis, par tū ar miļzeigu prīku pījiemu pīduovuojumu i gribieju struoduot ar maksimalu atdevi.

Mes truopējom iz polu laiku. Pajēmem applyudušū Preiļu skotus, es izvoduoju puišus ari pa sovom īmīļuotajom vītom. Myusim paleidzēja daudz cylvāku – kas ar sovu teirumu, kas ar kombainu. Filmejūt klipu “Eņgeli sviļpoj” beja ari tai, ka kamera stuovēja statiski vairuokuos vītuos, a piečuok miksieju. Tymuos šaļtēs es grūvuoju kūpā ar grupu kai koncertā i baudieju muzyku!

Runoj, ka muzykalū videoklipu zīdu laiki ir proguojuši? Tai ir?

Pa manim, taišni ūtraiži. Tehniskuo izpiļdiejuma ziņā tān var dareit breinumus... Niuliņ poši jaunuokī telefoni filmej daudz lobuok nakai pyrma 10 godim profesionaluos kamerys! Ar videoklipim tān vyss nasabeidz – muokslinīki veidoj videoblogus, doluos ar spylgtuokajim dzeivis momentim instagramā. Tys ir kai lels, vīnuots mehanisms.

 Kaida, tovupruot, ir kvalitativa dokumentala kina?

Kvalitativs produkts vysod ir lels dorbs, nav svareigi, par kū ir runa. Dokumentala kina? Juobyun īškejai degsmei par tematu, par kū tei kina ir. Vysai dorba komandai, vysim bez izjāmuma ir juopīlīk pyulis. Prūtams, ka ir svareigs tehniskais izpiļdejums, par kū atbiļdeigs es. Caur itū var uzrunuot skateituoju, izraisēt jimā interesi. Sataiseit tai, lai ir na tik popularzynuotniska, bet ari muokslinīciska vierteiba!

 Cik lela lūma foto un video muokslā ir duorgai, kvalitativai tehnikai?

Tehnikai eistineibā ir lela nūzeime... Svareiguokais ir na tikai attāla kvalitate, bet i lītuošonys ārtums, funkcionalitate. Cīši svareigi maņ, lai vyss napīcīšamais īlein vīnā mugarsūmā – gon kamera, gon stabilizators, gon skanis īkuortys. Attāla kvalitate – pyrmais prīškstots... Dīmžāl, pat televizejuos itei līta klyboj, biļde ir kai nu divtyukstūšūs.

 Tu ari fotografej. Kai, kū i deļ kam?

Fotografeja maņ ir sirds līta, ar tū īsasuoce muna radūšuo dzeive. Nasagrib ar foto nūsadorbuot naudys deļ. Tei ir kai līteņa tikai sev, kas paleidz uzturēt tonusā acs i smedziņus. Fotografeišona maņ ir kai kasdīnys gimnastika!

 Voi Latgolā ar video var nūpeļneit maizeiti?

Ka ir piec kuo naviņ pīprasejums i tu tū darbeņu dori kai sirds lītu – tod var! Tū pasyuteituojs pamona, jis grib struoduot taišni ar taidu cylvāku. I vēļ – juobyun daudz prasmju kūpā. Video operatoram na tikai juofilmej i juomoņtej, bet ari juomuok komunicēt, organizēt, generēt idejis.

 Tu filmieji kinu “Latgalīši Sibirī”. Kas īspaiduoja, kas puorsteidze? Kas palyka atmiņā?

Sibirī ir kū apsavērt! Ir! Gribātumīs otkon pabyut pi Baikala, golgolūs apbraukt vysam azaram apleik! Žāļ, ka Sibirī dzeivojūšī latgalīši mudri laikam asimilēsīs tik tuoli, ka vaira eisti navarēsim īsadūmuot stuostu par latgalīšim Sibirī tagadnis formā.

 Cik lela nūzeime tovā dzeivē ir ceļuošonai?

Esmu dyžon alkateigs ceļuotuojs. Pateik sovom acim redzēt kū naviņ jaunu – voi mežu, voi pogolmu. Vysod fotografeju. Varu pat naīt gulēt, kab satikt Zylū stuņdi pyrmiņ saulis lākta, kas ir eipašs laiks gaismys ziņā taišni deļ fotografejom un video.

 Voi tev ir kaidi profesionalī, kaidi dzeivis principi?

Pyrma kotra streida izsprīst, kas ir svareiguok – emocionali izaluodeit, pīruodeit sovu taisneibu, voi pabeigt dorbu. Dzeivē? Raudzeit maksimali dzeivuot tagadnē. Lai nav juonūžāloj, ka, tīcūtīs piec lobumim nuokūtnē, dzeive nav pylnvierteigi izdzeivuota tagad.

Komentāri

Lai pievienotu rakstam savu komentāru, nav jāsniedz personiska rakstura informācija. IP adrese, no kuras rakstīts komentārs, ir zināma tikai LL redakcijai un tā netiek izsniegta trešajām personām.

Redakcija izdzēsīs neētiskus un rupjus komentārus, kuri aizskar cilvēka cieņu un godu vai veicina rasu un nāciju naidu.