Latgalīšu volūda vaira nastuov krystcelēs

17. majs beja lela dīna Latgolys viesturē – Rēzeknē apsprīde Latgalīšu pareizraksteibys nūsacejumus, kurūs izstruodovuse Tīslītu ministrejis Vaļsts volūdys centra Latgalīšu raksteibys apakškomiseja, par oficialim pījiems Vaļsts volūdys centrs. Volūdnīki Anna Stafecka, Lideja Leikuma, Anna Vulāne, prīsters Edgars Cakuls, Latgalīšu volūdys, literaturys i kulturviesturis školuotuoju asociacejis vadeituoja Veronika Dundure, Latgolys Kulturys centra izdevnīceibys vadeituojs Juoņs Eļksnis, filologis Ilze Sperga i Skaidreite Kalvāne, diplomats i volūdnīks Aļberts Sarkaņs, dzejneica Anna Rancāne i Latgolys studentu centra vaļdis prīšksādātuoja Ilona Zaiceva beja dalykuši punktu latgalīšu rokstu volūdys reformai, kurū 20. godu symta 30. godūs beja īvadejs teologs i volūdnīks Pīters Strods ar kolegom. “Myusu pīduovuotajūs latgalīšu pareizraksteibys nūsacejumūs vysi jaunynuojumi ir preciziejumi, kū beja īplanovuse jau P. Stroda vadeituo komiseja,” apsprīsšonā atguodynova Anna Stafecka.